Viðmerkingar til verja av ungfiski
16.02.2012 - 23:25 - Kiran Jóanesarson
John Kári Jacobsen útróðrarmaður og skipari og ein av eigarunum á Bragd ger her viðmerkingar um málið við at lata upp tey stongdu økini inni við land.
Skal ikki kommentera um tað var rætt at siga landstýrismannin í fiskivinnumálum úr starvi ella ikki, men bert eina viðmerking um málið við at lata upp tey stongdu økini inni við land.
Ávísur tingmaður skrivar, at friðingarnar inni við land tóku støði í tilmæli frá Havstovuni. Til tað er at siga, at hetta er bert ein hálvur sannleiki.
Sum er, er tað veiða við línu, sum ikki kann royna á hesum leiðum, men snelluveiða hevur loyvi. Orsøkin til friðingar á hesum leiðum yvirhøvur, er verja av ungfiski.
Akkurát í hesum spurningi loypur ketan av, tí tað er júst snellan, sum tekur tann smæsta fiskin. Men tað er eingin trupulleiki, og við vælsignilsi frá undanfarna fiskimálaraharra J. D. og m.a frá hesum ávísa tingmanni, hevur tann veiðihátturin havt loyvi at troytt hesar leiðir.
Her kanska luktar av innhabiliteti, tá ið tað nú er so inn at tosa um gegni ella ógegni. Eg ynski bert at geva viðkomandi tingmanni góð ráð og ikki tosa hart um mál, ið ein ikki hevur skil fyri. Man kann ikki blása og hava mjøl í munninum. Havstovan sigur seg vita alt ov lítið um júst hesi økir. Annars er at siga, at tað neyvan hevði verið tann stóri skaðin um hesi øki opnaðu nú, tí millum annað er tað helst fari av fiskitíð á nógvu av hesum økjum.
Kelda: 24timar.fo
