Vesturvón skal skiftast út
16.02.2012 - 15:50 - Kiran Jóanesarson
Flakatrolarin Vesturvón er nú settur á sølulista, tí nýtt skip skal finnast fyri skipið, hetta váttar Anfinnur Olsen reiðari fyri Skipsportalinum.
-Vesturvón er nú sett til sølu, tí vit vilja hava nýggjari skip, sigur reiðarin í samrøðu við Skipsportalin.
Vesturvón er nú á veg heim, eftir at teir hava verið til fiskiskap síðan ársskitfið.
-Vit hava einki skip funnið fyri Vesturvón, og heldur ikki fingið nakað boð fyri skipið, Vesturvón er akkurát sett á sølulista, men av tí at vit selja skipið uttan kvotur, er tað ikki hugsandi at føroyingar keypa skipið.
Vit spurdu reiðaran um teir eru við í ætlanini, at keypa Skálaberg aftur til Føroya, men her svarar reiðarin stutt og greitt, at teir ikki hava nakað við ætlanina at gera.
-Vit hava hoyrt at fyrrverandi Skálaberg er til sølu, men vit hava einki við ætlanina at gera, og hava heldur ongan áhuga, at keypa skipið. Reinarin veit heldur ikki hvørjir teir eru, ið hava hesað ætlan.
Til endans spurdu vit reiðaran nær nýtt skip kann væntast, at koma í flotan fyri Vesturvón, og her svarar reiðarin, at so leingi Vesturvón ikki er seld, kemur einki skip inn staðin fyri. Sølupeningurin skal fíggja nýggja skipið sigur reiðarin til endans við Skipsportalin. Vesturvón er bygd í 1985.
